quote linkedin dugout

官方球迷會投稿

短片 1 相集

球迷會投稿:門將講門將

曼城香港官方球迷會訪問了Just癲Kepper的兩位門將,大談曼城上季今季的幾名門將

(編按:訪問於7月頭進行,當時袓赫特未落實外借韋斯咸) 

過去一季,城迷可算見證一個時代的變遷,尤其是龍門人選上的巨變,所以今次我地特別搵咗兩位門將:Facebook Page Just癲Kepper 的兩位創辦人: “單雙丸” 同 “安耶馬” 以門將身分同大家講下剛勇奪金手套嘅巴禾、城迷寵兒祖赫特和卡巴尼路,以及新紮師兄艾達臣。

先睇下佢地背景先 

單雙丸:連登同fb誤人子弟。波齡廿年,十一歲開始因為睇唔過眼同學守龍,又覺得救到波,睇到對手失望嘅樣好好丁,踏上守龍呢條不歸路⋯⋯因為成日都無機會出返去踢場區。(唉)

安耶馬:連登同fb誤人子弟。波齡差唔多廿年,因為小學時畀人叫守龍飛撲咗一球,結果就長期做龍門。曾經有一年試下做場區球員,但最後都係回歸兩柱之間,有時仲要挨住先夠舒服。(梳乎嗎?)

曼城過去一季放棄祖赫特,先後起用過巴禾,卡巴尼路把守城門,三位龍門各有長短處,你地對三個龍門有何評價??

祖赫特

單:技術好反應快,出道初期時有神救。無傳統英格蘭門神嗰種穩定(應救就救到,應入就比人入),但係有佢地另一種穩定:穩定咁大意派膠。佢應該要搵定下家架喇,哥帥嫌佢用腳唔夠好。

安:離開曼城幾成定局,不過缺乏球會斟介就直接顯示出佢嘅行情同間接講述佢嘅實力。雖然一直以來表現尚算穩健,但近年佢撲救左腳射門出現不穩,外借拖連奴時處理一啲高空波時有失誤。至於喺用波方面,祖赫特中規中矩,所以先會令人覺得佢被棄用好唔抵。

卡巴尼路

單:加盟曼城初期有啲慌(但好似西甲門將通病),但係今季由盃賽開始回復應有水準。因此由佢上陣時,感覺到後防球員有信心過拍住巴禾禾。

安:一位典型嘅南美門將,風格有少少瘋狂,腳下技術亦佳,不過因為佢喺歐洲已經浸淫良久,所以佢亦未算極瘋狂,佢亦唔算熱愛出迎,反應唔錯嘅佢不時都有神救。

巴禾

單:雷聲大雨點小,點知變左黃大仙!今季平均每場只有1.23次成功撲救⋯⋯  睇數據

佢都係走吧啦,英超唔利佢。(不過利申:如果以友隊球迷來講,佢留隊永續最好。笑)

安:巴禾今季喺英超嘅快速節奏展示出極大嘅唔適應,呢種不良反應除咗展示喺高波處理外(包括作客曼聯時嘅高空失誤令伊巴取得入球。),喺撲救上有唔少失波都睇得出佢未算做好十足反應,所以好似反應慢咗咁。

究竟呢樣野有冇得改﹖如果真係純粹未適應節奏,第二季應該會有改善嘅,如果都係改唔到就真係要講再見。

另外哥迪奧拿用包禾嘅原因係因為其腳下功夫,不過都係同上述問題一樣,因為英超節奏快,安耶馬就認為佢腳下功夫未能完全體現,而因為喺撲救同處理高波令佢無咗信心,佢喺自己擅長嘅範圍都有啲慌失失,就好似歐聯傳波畀舊隊友美斯,同埋又係對曼聯,諗住扭人點知差啲畀朗尼偷到波。

包禾被譽為曼城最失敗的收購之一,你地又會覺得包禾今季英超成敗因由何在?? 無地覺得佢來季如何自處?? 

單:去英超證明自己呢句真係唔是講笑,同樣由西甲:馬拉加過檔曼城嘅卡巴尼路應該有深刻體會。可能言語係另一個問題,始終龍門唔係剩係救波就夠,指揮唔到後防,係咁被人射都唔係辦法。除左學好同後防溝通,保持信心都好緊要。卡巴尼路走左又黎個艾達臣,睇黎下季都係坐多過踢。

安:失敗原因:佢未準備好,無論高波定係節奏都完全未準備好,導致出迎救波畀人印象都好似慢半拍。預期開季初可能同艾達臣各司其職,巴禾踢歐聯,艾達臣踢英超,相信除非艾達臣仲膠過佢,如果唔係歐聯相信係主戰場,然後就係等走了… 

 

祖赫特貴為英格蘭一號門神,隨住曼城購入巴西新星:艾達臣,相信來季若果留隊亦未必有運行,你地覺得佢應該如何自決

單:一個字講晒:轉會。光頭佬一定唔會比機會佢。

安:由於哥帥已經早定諗法,睇怕都係要走,不過而家喺轉會市場比佢更有實力同進步空間嘅門將大有人在,而家好尷尬地算有價無市,加上高人工令唔少球會難以負擔,除非佢放下身段減人工,如果唔係連走都未必走到… 

講到新紮師兄艾達臣,你地如何評價佢嘅長短處,橫觀近十年英超搵食嘅兩位巴西門神:高美斯,施薩表現都不似預期,你地覺得佢又會唔會步兩位師兄後塵??

單:上面提過言語不通會係大問題,加上英超嘅對抗性+高波,我深信佢一定要至少一季時間先適應到。留名睇哥迪奧拿下季季尾又簽龍(如果佢仲喺度)

安:喺安耶馬眼中,艾達臣算係施薩嗰種嘅反應型門將,因為佢哋一樣反應極快,而兩者身型極似,所以可以預期艾達臣撲波方面無問題,而出迎就睇佢個人選擇了,如果唔勉強,都可以淨玩反應免於出醜。

至於用波方面安耶馬都暫時未睇到佢特點,呢樣野都係顧好救波先喇。至於未來點樣,唔好學似前輩施薩咁反應一慢就表現大跌,就睇佢點樣喺英超磨練出迎判斷了。高美斯呢…就算吧啦,本身屬神經刀嘅佢一時神一時膠是常吧!不過近來喺屈福特都算過得唔錯嘅,都符合佢級數…

艾達臣雖然年輕但落到場幾成熟,而且又有鬥心及激情,相信就算遇到挫折都可以好快恢復,而且佢喺賓菲加都唔係一帆風順,因此可以練就比較強嘅心理質素,因此安耶馬絕對認為佢會比前輩更有前途!

今次講住咁多先,我地等半季後,再同大家講下:艾達臣,巴禾,祖赫特嘅表現同英超各龍門。

特別鳴謝:Just癲Keeper 代表- 安耶馬、單雙丸

--------------

感謝曼城香港官方球迷會提供內容 

 

 

官方球迷會投稿

父親節快樂:三個城爸的故事

特別企劃

球迷熱話:夢幻十一人

官方球迷會投稿

城迷故事Marc Luk (下): 會長生涯原是…

由曼城香港官方球迷會全力泡製的「城迷故事Marc Luk篇」來到一連三集的最終回;搞球迷會不是一件容易的事,這些年Marc 也和球迷會一同經歷過高低跌宕,也慶幸遇上不少真心同路人...

「城迷故事」系列;每一個城迷,都有獨一無二的故事