quote linkedin dugout

官方球迷會投稿

短片 1 相集

城迷故事Marc Luk (下): 會長生涯原是…

由曼城香港官方球迷會全力泡製的「城迷故事Marc Luk篇」來到一連三集的最終回;搞球迷會不是一件容易的事,這些年Marc 也和球迷會一同經歷過高低跌宕,也慶幸遇上不少真心同路人...

 做咗3年聯席會長,隨住拍檔Tom叔退休離港,Marc因家庭同工作關係,選擇咗急流勇退。回首呢3年,有時難免會有種「你叫我最快樂你也叫我最心痛」嘅感覺。(小編OS:下……愛在迷茫中?)

  

提起上莊,佢笑笑口咁講一切都係機緣巧合嘅事。

Marc:我本身淨係想同班城迷朋友每個禮拜出來玩下飲下野Relax下,無諗過做會長。大概係2013年中,因時任會長Mr Hill 需要離港工作,而當時我係其中一個出來玩得比較多嘅華人會員,咁候任主席Tom叔好自然咁搵咗我一齊做聯席會長。始終呢個球迷會紮根香港,需要華人分擔會務好正常嘅。

(小編OS:第日想做會長嘅朋友,機會嚟啦飛雲!)

Marc和拍檔Tom叔(右)

俾個😀

Marc:令我最自豪嘅事應該係參與設計兩份會員禮品——T-Shirt同埋頸巾。首先我唔係讀設計出身,咁靚唔靚就好睇個人,但由自己一手一腳咁去做個設計草圖,再搵廠商製作實物,就好似睇住自己個baby出世咁興奮。間中仲會響IG、FB見到城迷朋友著住、戴住佢哋入場睇波或者參與海外分會嘅活動,諗返起幾辛苦都值得。

親善大使?!

俾個💙

Marc:令我最驕傲嘅事應該係自己唔經唔覺咁做咗三年會長,每星期同Tom叔幾乎風雨不改咁落主場餐廳撐場。(小編OS:2013年9月八號風球下嘅打吡戰佢哋都有出嚟睇㗎!) 後來慢慢咁吸引更多嘅城迷朋友一齊嚟玩。雖然相比其他英超列強嘅本地球迷會規模之大真係仲有好大段距離,但呢幾年嘅心機總算無白費到。

而家來睇波嘅又何止鬼佬呢

 

俾個😡

Marc:令我最嬲嘅事莫過於曾經有段時間,個別嘅城迷冒充我地官方球迷會向傳媒機構出文,同時借助唔同嘅社交媒體招搖撞騙,發表失實同唔負責任嘅言論抹黑我哋,例如:

「官方個班人只會灣仔蘇豪區個D好高消費玩,去得酒吧唔會係正當人家」

「佢地只係一班鬼佬閂埋門圍爐,唔歡迎本地人」

呢啲言論喺當時對個會嘅名聲,唔多唔少有影響。我本身係好樂意見到曼城喺香港嘅球迷基礎日漸壯大,可能我本身唔係一個好叻social同辭令嘅人,我真係唔止一次講:大家不如Join埋一齊玩,無需要分你我,不過當時會入面英國朋友係多D,一個人兼顧唔到咁多本地城迷朋友,所以令人誤會咗,呢樣嘢希望大家諒解。

同埋我個人都唔係咁方丈嘅,出現其他同好組織好正常,但打正旗號冒充官方球迷會,仲要唱衰話取代我地,我睇怕要扮王祖藍高八度講句:我接受唔到囉~好在嗰段hard time我地都捱過咗。

(小編OS:大家都係城迷,相煎何太急?)

俾個😭

Marc:令我最心痛嘅事係要重新建立球迷會個名聲。所謂人言可畏,一個大話重覆一百次便會變成真理,尤其係而家呢個Social media is everything年代。曾經有未接觸過我地嘅城迷話信以為真,但接觸過之後原來係另一回事 ...... 

「我以為出嚟灣仔睇波等於好高消費,其實都係一百幾十豐儉由人」

「估唔到有人會主動同新朋友傾計,你地唔係鐘意閂埋門圍爐架咩」

諗返起真係真係喊出嚟……我覺得文化差異係一大問題:因為英國人睇波文化就係 一大班人柴娃娃出來飲吓嘢,大家high high地咁載歌載舞嗌下之後先入場。我地雖然只係响餐廳睇直播,但性質差唔多,呢D同香港睇波文化一定有啲分別。

其實近呢幾年真係多咗本地會員,兩者又融合得幾好。本地嘅朋友仔不時一齊高唱打氣歌,英國會友亦有主動去學廣東話,包括唔少門下字。

(小編OS獎門人TONE:咁呢次打和啦Super~)

 

俾個😲

Marc:令我最意想唔到嘅係接我手嘅一班helper兄弟姊妹,由最基本嘅社交網站營運,到圖片設計、招募會員、活動規劃等等,佢地都比以往攪得更有規律。從我哋嘅whatsapp group度不時睇到佢地每日會花好多心機時間落個會度:度橋、諗下點做好個會,坦白講我好感動亦覺得自愧不如。所以如果再有機會,我都希望同佢地一齊合作攪好呢個會。

Hong Kong Supporters Club

後記 

朝聖,追星,見偶像……都係城迷夢寐以求,但可能係人地眼中嘅瘋狂事。小編對佢印象最深嘅要數到2014年5月,曼城勇奪英超冠軍個晚。正當全場城迷喺舊主場餐廳Maya又唱又跳,玩到high曬時候,佢赤裸上身除淨條孖煙囪底底響駱克道跑街,原來係為咗兌現承諾,做找數真漢子~(小編OS:好彩你唔係同人賭__切……菜煲湯派街坊 LOL)

其實一段關係總有一D瘋狂事,Marc與曼城是戀一世的愛。身為城迷嘅你又有無做過一D人地眼中嘅瘋狂事?

Marc(中) 從現任會長Mr Knowles (左) 手上接過全隊簽名紀念Tee,以示落莊

----------

感謝曼城香港官方球迷會投稿

官方球迷會投稿

城迷故事Marc Luk(中):朝聖與追星

由曼城香港官方球迷會編採的「城迷故事Marc Luk篇」的中篇;作為城迷,朝聖以及和球員近距離接觸,當然是大家的夢想...

「城迷故事」系列;每一個城迷,都有獨一無二的故事

官方球迷會投稿

官方球迷會投稿:巧遇前曼城攝影師Sharon Latham

特別企劃

初七人日送大禮 結果公佈